Úkraínuher sagður ráðast inn á rússneskt landsvæði
Setja bókamerki
Úkraínumenn og Rússar virðast nú heyja harða orrustu í Kúrsk-héraði í Rússlandi en þar eiga löndin mæri að hvort öðru. Fimm borgarar eru sagðir látnir.
Bardagar hafa staðið þarna yfir frá því í gær en Rússar segja að þúsundir manns hafi flúið svæðið. Þeir saka Úkraínumenn um að ráðast á borgaralega innviði.
Stríðið í Úkraínu virðist með þessu hafa færst inn á rússneskt landsvæði og hefur það komið Rússum í opna skjöldu.
Meiriháttar „ögrun“
Úkraínumenn hafa reyndar ekki lýst yfir ábyrgð á innrásinni, sem er sú alvarlegasta á síðustu mánuðum, en eimildarmaður AFP í öryggisþjónustu Úkraínu segir að úkraínskur dróni hafi skotið niður þyrlu yfir Kúrsk nýlega.
„Eins og þið vitið, hefur ríkisstjórnin í Kænugarði tekið sér stórfellda ögrun fyrir hendur,“ sagði Vladimír Pútín Rússlandsforseti á fundi með öryggisþjónustunni sem sýndur var í beinni útsendingu í dag.
„Hún skýtur af handahófi með hinum ýmsu vopnum, þar á meðal flugskeytum, á borgaralegar byggingar, íbúðahúsnæði og sjúkraflutningabíla.“
Fimm sagðir látnir
Mörg þúsund manns hafa flúið Kúrsk vegna bardaganna, að sögn rússneskra yfirvalda.
Áhlaupið hófst í gærmorgun en þá tilkynnti rússneska varnarmálaráðuneytið að Rússaher hefði náð að hrekja á brott úkraínska hermenn sem réðust inn í héraðið.
Í það minnsta fimm óbreyttir borgarar eru látnir frá því að bardagar hófust, að sögn rússneskra stjórnvalda. Þá séu 24 særðir, þar af þrettán á sjúkrahúsi.
Alexei Smírnov héraðsstjóri segir að yfirvöld hafi náð tökum á ástandinu.
Kl. 9.30 í morgun sagði varnarmálaráðuneyti Rússa að búið væri að koma í veg fyrir að Úkraínumenn kæmust lengra inn á rússneskt landsvæði.
Alvarlegt vinnuslys í Grindavík
Myndir: „Gekk bara glimrandi vel“
Ísland er enn í hjarta mínu og huga
Lætur langvinn veikindi ekki stöðva sig
Bera fyrir sig breytingar og nýja stofnun
Óvissa undir Ásmundi: „Sorglegt og alvarlegt“
Óvenjulegar aðstæður og lítið af vísbendingum