Komst tvisvar um borð í flugvél án farmiða

Norskum ferðamanni tókst að komast um borð í flugvél á flugvellinum í Munchen í Þýskalandi án farmiða tvo daga í röð í byrjun ágúst. Maðurinn flaug til Svíþjóðar í seinna skiptið.

Maðurinn laumaði sér um borð með því að smeygja sér í gegnum sjálfvirkt hlið þar sem farþegar skanna brottfararspjöldin sín áður en hliðið lokaðist eftir að fyrri maður hafði skannað sitt spjald.

Vakti athygli starfsmanna á málinu

Ferðalangurinn laumaðist framhjá starfsfólki flugfélagsins þegar hann komst um borð í vélina.

Upp komst um manninn vegna þess að vélin sem hann var kominn um borð í var fullbókuð. Var hann afhentur lögreglu í kjölfarið og kærður en stuttu síðar sleppt.

Maðurinn lét ekki þar við sitja og notaði sömu tækni daginn eftir og fór með flugi til Svíþjóðar.

Við komuna í Stokkhólmi vakti hann athygli starfsmanna flugvallarins á því að hann vildi fara aftur til Munchen og var hann afhentur lögreglu.

• Blogga um frétt