George Santos, fyrrverandi þingmaður í fulltrúadeild Bandaríkjaþings, er sagður munu játa sök á mánudag þegar hann mætir í dómsal í tengslum við meint fjársvik.
Frá þessu greinir bandaríska dagblaðið New York Times og segja að tveimur lögmönnum nokkurra vitna í málinu hafi verið tjáð af saksóknurum að Santos hygðist játa sök. Hann hafi þá gert samkomulag við saksóknara en skilyrði þess liggja enn ekki fyrir.
Santos var látinn víkja af þingi síðasta haust vegna ýmissa hneykslismála sem hann er tengdur. Demókratinn Tom Suozzi tók sæti Santos í fulltrúadeild bandaríska þingsins.
Santos hefur meðal annars verið ákærður fyrir auðkennisþjófnað og að hafa logið að kjörstjórn. Í janúar samþykkti mikill meirihluti þingmanna, þar á meðal 100 Repúblikanar, í atkvæðagreiðslu að víkja Santos frá þingstörfum. Ákæruliðirnir eru 23 talsins.
Hann er einnig sagður hafa borgað skuldir og keypt merkjavörur í eigin þágu gegnum kreditkort fólks sem lagði honum til fé í kosningabaráttu sína og þá er honum gefið að sök að hafa svikið töluverðar fjárhæðir frá stuðningsmönnum sínum í gegnum frjáls félagasamtök sem aldrei voru til.
Times segja að tveir aðrir heimildarmenn sínir sem hefðu mikla þekkingu á málinu hefðu einnig staðfest að Santos ætlaði að játa á sig fjársvik. Annar þeirra hafi sagt að Santos myndi gera grein fyrir glæpum sínum þegar hann tæki til máls í dómsal á mánudag.
Hann getur samt enn skipt um skoðun.