Þúsundir manna neyddust til þess að flýja heimili sín í Frakklandi vegna gróðurelda í Suður-Frakklandi í gær. Búið er að ná tökum á eldunum.
Eldar kviknuðu í strandbænum Canet-et-Roussillon nærri Perpignan-borg og í strandbænum Frontignan nærri Montpellier-borg.
Eldarnir nærri Perpignan ollu því að um þrjú þúsund manns þurftu að flýja tjaldsvæði í bænum, eyðilögðu eitt hjólhýsi og skemmdu fimm önnur. Eldarnir hjá Montpellier hafa eyðilagt um 300 hektara af landi.
Búið er að ná tökum á eldunum að mestu en 600 slökkviliðsmenn unnu að verkefninu.