Fjöldi innflytjenda til Kanaríeyja hefur rúmlega tvöfaldast á árinu. Samkvæmt tölum frá innanríkisráðuneyti Spánar hafa 22.304 manns sest að á eyjunum frá byrjun árs til 15. ágúst.
Borið saman við sama tímabil á síðasta ári settust 9.864 manns að á eyjunum.
Innflytjendum hefur þannig fjölgað um 126% á milli ára.
Innflytjendurnir koma margir hverjir frá Máritaníu, Gambíu og Senegal. Afríkuríkja sem Pedro Sanchez, forsætisráðherra Spánar, sækir heim 27. ágúst.
Sanchez heimsótti Máritaníu í febrúar ásamt Ursulu von der Leyen, forseta framkvæmdastjórnar Evrópusambandsins.
Í heimsókn þeirra tilkynnti von der Leyen 210 milljóna evra fjárstuðning við rekstur tengdan farandfólki í Máritaníu.
Máritanía hýsir um 150.000 manns á flótta og er orðin ein helsta brottfararstöð farandfólks á leið til Kanaríeyja.
Margir hverjir halda til eyjaklasans á viðarbátum og við hættulegar aðstæður.
Talið er að auknar vinsældir Kanaríeyja meðal farandfólks séu sökum aukins viðbúnaðar yfirvalda á Miðjarðarhafinu.
Rúmlega 5.000 manns létu lífið á leið sinni til Spánar yfir Miðjarðarhafið á fyrstu fimm mánuðum ársins, sem nemur 33 dauðsföllum á dag.