Liðlega 40 rússneskir slökkviliðsmenn hafa slasast við að reyna að slökkva bál sem kviknaði eftir að loftskeyti Úkraínuhers hæfði olíugeymslu í borginni Proletarsk í suðurhluta Rostov héraðs í Rússlandi.
Eldurinn hefur geisað í tvo daga.
Vasily Golubev, héraðsstjóri Rostov-héraðs, sagði í færslu á samskiptamiðlinum Telegram að 41 slökkviliðsmaður hafi þurft að leita á bráðamóttökuna eftir átök við eldinn.
Hann sagði átján þeirra hafa þurft á innlögn að halda og að fimm þeirra væru á gjörgæslu.
Um 20.000 manns búa í Proletarsk, en samkvæmt yfirvöldum í borginni er ekki hætta á að eldurinn dreifi úr sér í nærliggjandi íbúðarhverfi.
Fyrr í mánuðinum sótti Úkraínuher á Kursk-hérað Rússlands af hörku.
Volodimír Selenskí Úkraínuforseti sagði loftárásirnar réttlætanlegar í ljósi árása Rússa á skotmörk í Úkraínu.