Fordæmir hrottalegar aðfarir Ísraela
Setja bókamerki
Alice Jill Edwards, skýrsluhöfundur Sameinuðu þjóðanna um pyntingar og ómannúðlega meðferð fanga, fordæmir það sem hún kallar „sérstaklega hrottafengnar“ aðfarir Ísraela í garð palestínsks fanga sem sætti kynferðislegri misnotkun af hendi ísraelskra hermanna.
„Pyntingar af kynferðislegum toga og önnur kynferðisleg ómannúðleg og niðurlægjandi meðferð er ekki réttlætanleg undir nokkrum kringumstæðum,“ segir Edwards í yfirlýsingu sem hún hefur sent frá sér um þetta tiltekna mál.
Eftir því sem ísraelsk ákæruyfirvöld greina frá hafa þeir hermenn, sem liggja undir grun, verið hnepptir í varðhald meðan á rannsókn málsins stendur en árásin á fangann palestínska er sögð hafa átt sér stað í Sde Teiman-fangelsinu í Negev-eyðimörkinni í Suður-Ísrael.
Margir hafi fallið fyrir eigin her
Ísraelska utanríkisráðuneytið hefur ekki svarað fyrirspurn Reuters-fréttastofunnar um málið en Sameinuðu þjóðunum hefur borist fjöldi skýrslna um meintar pyntingar palestínskra fanga frá því vígamenn Hamas-samtakanna réðust inn í Ísrael í október í fyrra og myrtu á tólfta hundrað manns eftir því sem ísraelsk stjórnvöld hafa látið í veðri vaka.
Síðan hefur ísraelska dagblaðið Haaretz þó greint frá því að margir þeirra 1.139 ísraelsku hermanna og borgara sem féllu í innrásinni hafi í raun orðið fórnarlömb eigin skriðdreka og þyrlna Ísraelshers en ekki innrásarliðs Hamas-samtakanna.
Rúmlega 40.000 manns hafa fallið á Gasasvæðinu í tíu mánaða langri árás Ísraela eftir því sem palestínsk stjórnvöld greina frá en auk þess eru þúsundir Palestínumanna sagðir í haldi Ísraela samkvæmt skýrslum Sameinuðu þjóðanna.
Hamas-samtökin hafa nú ítrekað ákall sitt til alþjóðasamfélagsins um óháða rannsókn á ofbeldisverkum Ísraela í garð palestínskra borgara.
Eftir því sem ísraelsku mannréttindasamtökin B'Tselem greina frá í skýrslu hafa Ísraelar komið sér upp kerfisbundnu misnotkunar- og pyntingaferli sem þeir beita fanga sína síðan væringarnar á Gasasvæðinu hófust.
Ástæða þess að ekki gýs enn
Málverkið fauk út í veður og vind
Rask á starfsemi skóla í Reykjavík
Eldgos hafið á Reykjanesskaga
Bjarni: Algjör vatnaskil í samgöngumálum
Eldfjall sem þarf að taka mark á
Rannsaka hvort og þá hvaða vopni var beitt