Rússar og Úkraínumenn skiptust hvorir á 115 stríðsföngum sín á milli í dag. „115 verndurum var skilað heim í dag,“ skrifar Volodimír Selenskí Úkraínuforseti á samfélagsmiðla.
Varnarmálaráðuneyti Rússlands skrifar einnig: „Sem niðurstaða í samningaviðræðum hefur 115 rússneskum hermönnum, sem teknir voru í hald á Kúrsk-svæðinu, verið skilað heim frá svæðum sem stjórnvöld í Kænugarði hafa lagt undir sig.“
Úkraínumenn réðust nýlega inn í Kúrsk-hérað í Rússlandi og kom innrásin mörgum í opna skjöldu, ekki síst Rússum. Úkraínuforseti hefur sagt hersveitir sínar hafa náð settum markmiðum í sókn sinni, sem hófst þann 6. ágúst.
Úkraínumenn hafa á þessum tíma tekið fjölda hermanna í hald í „stríðsfangaskiptasjóðinn“ sinn, eins og Selenskí orðar það. Hann segir að innrásin sé til þess að skapa „hlutlaust svæði“ til að verja Úkraínu frá frekari árásum Rússa.