Nýr sáttmáli á milli Bretlands og Þýskalands

Keir Starmer, forsætisráðherra Bretlands, hét því í ferð sinni til Berlínar að nýr sáttmáli við Þýskaland væri hluti af sókn Bretlands til að styrkja aftur tengsl við Evrópusambandið eftir Brexit.

Sáttmálinn er hluti af markmiðum nýrrar ríkisstjórnar Bretlands til að styrkja tengsl við Evrópu. Hann nær yfir fjölda málefna, allt frá varnarmálum yfir til viðskipta á milli þjóðanna. Olaf Scholz, kanslari Þýskalands, fagnaði áfanganum.

„Vöxtur er mikilvægasta verkefni ríkisstjórnar minnar og við vitum að til þess að ná þeim markmiðum er mikilvægt fyrir okkur að styrkja samband okkar við samstarfsaðila hér í Þýskalandi og víðar í Evrópu,“ sagði Starmer á blaðamannafundi.

Ferð Starmer til Þýskalands er hluti af tveggja daga ferðlagi hans til æðstu ríkja ESB en Starmer mun einnig eiga fund með Emmanuel Macron Frakklandsforseta.

Vinur og samstarfsaðili

Tveimur vikum eftir sigur í kosningum sat Starmer leiðtogafund evrópskra stjórnmálasamtaka (EPC). Þar sagði hann Bretland ávallt vera vin og samstarfsaðila Evrópu, en hann útilokaði að Bretland myndi ganga aftur í innri markaði Evrópusambandsins þar sem enn eru óeiningar innan stjórnmála í Bretlandi varðandi ESB.

Hann kvaðst þó vilja semja um nýjan öryggissáttmála við Evrópusambandið og dýralæknasamninga til að auðvelda landamæraeftirlit með með landbúnaðarmatvælum sem og að semja um nýjan viðskiptasamning.

• Blogga um frétt