Harris segir Trump hafa vanvirt helga jörð
Setja bókamerki
Kamala Harris, forsetaframbjóðandi demókrata í Bandaríkjunum, segir að Donald Trump, mótframbjóðandi hennar úr Repúblikanaflokknum, hafi vanvirt helga jörð í Arlington-kirkjugarðinum í Washington-borg í pólitískum tilgangi.
Á fimmtudaginn tilkynnti Bandaríkjaher um að starfsmanni kirkjugarðsins hefði verið „ýtt snögglega til hliðar“ í kjölfar þess að hafa beðið starfsfólk kosningateymis Trumps um að hætta að mynda við grafreit þar sem bandarískir hermenn sem hafa nýlega látist í stríði eru jarðaðir.
Á þeim stað er myndataka í pólitískum tilgangi bönnuð. Bandaríkjaher hefur sagt atvikið „óheppilegt“.
Starfsmaðurinn fyrirlitlegur
Atvikið átti sér stað þegar Trump ásamt tökuliði heimsótti kirkjugarðinn með fjölskyldum 13 hermanna sem voru drepnir í sprengjuárás í Kabúl, höfuðborg Afganistan, klukkustundum áður en Bandaríkjaher yfirgaf landið árið 2021.
Stjórn Joes Bidens, núverandi Bandaríkjaforseta, fyrirskipaði að afturkalla allt herlið úr landinu á sínum tíma og var sú aðgerð harðlega gagnrýnd.
Trump hefur sjálfur gagnrýnt ákvörðun Bidens í þessu máli í kosningabaráttu sinni og heldur Trump því fram að hann hefði afgreitt málið betur en sitjandi forseti, hefði hann haft kost á því.
Kosningateymi Trumps hefur lýst kirkjugarðsstarfsmanninum sem „fyrirlitlegum einstaklingi“ og fullyrt að hún hafi verið veik á geði.
Hermenn skuli vera heiðraðir
„Leyfið mér að vera alveg skýr: Forsetinn fyrrverandi vanvirti helga jörð, í pólitískum tilgangi,“ segir Harris um atvikið, á samfélagsmiðlinum X.
„Ef það er eitthvað sem við sem Bandaríkjamenn getum öll verið sammála um, er það að fyrrverandi hermenn okkar, fjölskyldur hermanna og hermenn sjálfir eigi að vera heiðraðir, aldrei lítilsvirtir, og komið fram við þá með okkar allra mestu virðingu og þakklæti,“ segir Harris.
Villandi skilaboð um verðlækkanir hjá Nettó
Mun lækka fasteignaverð þrátt fyrir hærra lóðaverð
„Við verðum að vinda ofan af þessu“
„Það ber enginn meiri ábyrgð á stöðu flokksins en ég“
„Bryndís Klara er dóttir mín“
Ísland verði ekki að „fyrirheitnu landi hælisleitenda“
Harris segir Trump hafa vanvirt helga jörð