Israel Katz, utanríkisráðherra Ísraels, segir að stjórnvöld muni „bregðast við af fullum krafti“ eftir að lík sex gísla sem höfðu verið í haldi Hamas-samtakanna fundust á Gasasvæðinu.
Í færslu á X kenndi Katz Hamas um dauða þeirra og sagði þá hafa verið „tekna af lífi á grimmilegan hátt…til að vekja upp ótta og í tilraun til að sundra ísraelsku samfélagi“, að því er BBC greindi frá.
Allsherjarverkfall hófst í Ísrael í morgun til að þrýsta á stjórnvöld í landinu um að ná samkomulagi um lausn gíslanna sem enn eru í haldi Hamas.
Arnon Bar-David, leiðtogi ísraelsku verkalýðssamtakanna Histadrut, sagði slíkan samning „mikilvægari en nokkuð annað“.
„Við erum að fá líkpoka í staðinn fyrir samning,“ sagði hann.