Trump og Harris hittast í fyrsta sinn
Setja bókamerki
Tengdar fréttir
Donald Trump verðandi Bandaríkjaforseti
Þegar Donald Trump, forsetaframbjóðandi repúblikana, og Kamala Harris, forsetaframbjóðandi demókrata, mætast í kappræðum í næstu viku verður það í fyrsta sinn sem þau tvö hittast á ævinni.
Spennan í stjórnmálunum vestanhafs er áþreifanleg en nánast enginn fylgismunur er á frambjóðendunum tveimur í sjö helstu sveifluríkjunum sem koma til með að ráða úrslitum um það hver vinnur kosningarnar.
Kappræðurnar verða klukkan eitt að nóttu til á miðvikudag á íslenskum tíma, eða klukkan 21 á þriðjudegi að staðartíma. Kappræðurnar fara fram í Stjórnarskrársetrinu í Pennsylvaníu og ABC news heldur utan um þær og sjónvarpar.
Kappræðurnar munu standa yfir í 90 mínútur og verða tvö auglýsingahlé.
Mætt til til að undirbúa sig
ABC mun ekki gefa út hvaða mál verða helst rædd en ætla má að meðal annars verði farið yfir efnahagsmál, útlendingamál, aðgengi kvenna að fóstureyðingum, utanríkismál og jafnvel framgöngu Trumps í kjölfar þess að hann tapaði síðustu forsetakosningum.
Undirbúningur frambjóðenda er mismunandi en í dag mætti Harris til Pennsylvaníu þar sem hún mun vera ásamt ráðgjöfum næstu fimm daga til að undirbúa sig fyrir kappræðurnar.
Hún er ekki með skipulagða viðburði á dagskrá fram að kappræðunum og minnir undirbúningur hennar á undirbúning Joe Bidens Bandaríkjaforseta áður en hann mætti Trump í júní.
Tulsi Gabbard undirbýr Trump
Á sama tíma hefur Donald Trump sagt að hann sé að undirbúa sig fyrir kappræðurnar eins og hann gerði fyrir kappræðurnar á móti Biden, með því að mæta í viðtöl, halda kosningafundi og ræða við ráðgjafa um ýmis mál.
Þó hann segi það ekki opinberlega þá er ekki ólíklegt að hann sé að undirbúa sig nokkuð ítarlega fyrir kappræðurnar enda mikið í húfi.
Sem dæmi má nefna að í undirbúningsteymi Trumps er Tulsi Gabbard sem mætti Harris í kappræðum í forvali demókrata fyrir síðustu kosningar. Frægt er þegar Tulsi Gabbard las henni pistilinn í einum kappræðunum og átti Harris erfitt uppdráttar í kjölfarið.
Fáir jafn sjóaðir og Trump
Trump er ekki þekktur fyrir mikinn aga í kappræðum sem hefur komið honum í klandur áður.
Repúblikanar vonast þó til þess að hann undirbúi sig vel og einbeiti sér að málefnunum, en hann mælist almennt með meira traust meðal Bandaríkjamanna til að sjá um efnahagsmál og útlendingamál heldur en Harris.
Fáir eru jafn sjóaðir í forsetakappræðum og Trump og því ekki ólíklegt honum muni líða nokkuð þægilega á stóra sviðinu. Líklega mun hann einblína á útlendingamálin og efnahagsmálin eins og í síðustu kappræðum.
Mun líklega hampa fyrri störfum sem saksóknari
Kamala Harris er fyrir mörgum Bandaríkjamönnum enn nokkuð óþekkt og mörgum þykir óljóst hvað hún stendur fyrir nákvæmlega.
Hún mun væntanlega einblína á fóstureyðingarmálin sem hefur reynst repúblikönum nokkuð erfitt mál meðal kvenkyns kjósenda.
Harris var á árum áður yfirsaksóknari í San Francisco og síðar ríkissaksóknari í Kaliforníu árið 2010. Í kosningabaráttu sinni hefur Harris reynt að mála þá mynd að hún sé saksóknarinn á móti glæpamanninum.
Væntanlega mun hún reyna að mála svipaða mynd í kappræðunum með því að vísa í fyrri störf sem saksóknari og benda á dómsmálin sem Trump hefur þurft að glíma við.
Slökkt á hljóðnemum
Engir áhorfendur verða í salnum og þá verður slökkt á hljóðnemum þegar hinn frambjóðandinn er með orðið.
Frambjóðendur mega ekki ræða við ráðgjafa í auglýsingahléum og þeir mega ekki mæta með neina muni. Þó verður þeim leyft að vera með blað og penna fyrir framan sig.
Tengdar fréttir
Donald Trump verðandi Bandaríkjaforseti
Ákærður fyrir stunguárás á menningarnótt
Rannsókn á menningarnæturmáli lokið
Hvatti kjósendur til þess að greiða ógild atkvæði
Fundur hafinn hjá kennurum, ríki og sveitarfélögum
Ekki hægt að slá gosið út af borðinu strax
Sendi nektarmyndir af dreng sem hann passaði
Formaðurinn útilokar ekki undirritun í kvöld
Dæla, kæla og verja mikilvæg mannvirki