Enn ekkert millilandaflug mánuði síðar

Formaður grænlensku landstjórnarinnar, Múte B. Egede, og samgöngu- og innviðaráðherra Grænlands, Hans Peter Poulsen, hafa kallað forsvarsmenn alþjóðaflugvallarins í Nuuk á sinn fund til að ræða ástandið sem nú hefur komið upp á flugvellinum, þar sem ekkert millilandaflug er ekki heimilt. 

Dönsk flug­mála­yf­ir­völd ákváðu 14. ág­úst að af­lýsa öllu milli­landa­flugi frá Nuuk, höfuðborg Græn­lands, á meðan unnið væri að því að koma ör­ygg­is­mál­um og eft­ir­liti á flug­vell­in­um í viðun­andi horf. Nú er mánuður liðinn og ekkert hefur breyst.

Frétt af mbl.is

Ekkert millilandaflug á meðan öryggismál eru í ólagi

Ástandið óviðunandi

Á Facebook-síðu flugvallarins kemur fram að stöðvunin verði í gildi fram í byrjun október, þegar fulltrúar frá samgöngustofu Danmerkur komi aftur í eftirlitsferð á völlinn.

„Við erum að vinna hörðum höndum og einbeitt að því að ná tökum á því sem upp á vantar svo að millilandaflug geti hafist að nýju og hörmum enn og aftur innilega þau óþægindi sem þetta hefur í för með sér fyrir viðskiptavini okkar og farþega,“ sagði Jens Lauridsen, forstjóri flugvallarins.

Í fréttatilkynningu þar sem greint var frá því að grænlensk yfirvöld hefðu boðað forsvarsmennina á sinn fund var haft eftir Múte B. Egede að núverandi aðstæður væru óviðunandi og að landstjórnin gerði ráð fyrir að meiri áhersla yrði lögð á að bæta úr vandanum.

DR

• Blogga um frétt