Kósóvó mun hýsa 300 fanga fyrir Danmörku

Danir hafa samið við Kósóvó að hýsa 300 fanga sem hlotið hafa dóm í Danmörku. Fangarnir sem verða fluttir til Kósóvó verða fangar sem eru með ríkisborgararétt utan aðildarríkja Evrópusambandsins.

Reuters greinir frá.

Guðrún Hafsteinsdóttir dómsmálaráðherra sagði í samtali við Morgunblaðið í gær að henni þætti sjálfsagt að skoða það að semja við önnur ríki um að hýsa fanga með erlendan ríkisborgararétt fyrir Ísland.

Frétt af mbl.is

Erlendir fangar sendir til útlanda?

Yfirfull fangelsi

Bretar eru að skoða slíkt úrræði með Eistum og þingið í Kósóvó samþykkti samning við Dana um slíkt úrræði í mái.

Ástæðan í tilfelli Dana og Breta er yfirfull fangelsi, en á Íslandi er einnig langur listi fólks sem bíður afplánunar. Í Danmörku eru um 1.000 manns sem bíða afplánunar.

Fangelsisyfirvöld í Kósóvó munu endurbyggja Gjilan-fangelsið sem mun vera með rými fyrir 300 fanga.

Greiða rúmlega þrjá milljarða á ári

Þegar samningurinn var fyrst kynntur árið 2021 vakti það áhyggjur af meðferð fanga í Kósóvó. Danir segja hins vegar að þeir muni fá sömu meðferð og lúta sömu reglum og í dönskum fangelsum.

Áætlað er að Kósóvó muni fá 32 milljarða króna næstu 10 ár, eða um 3,2 milljarða á ári, gegn því að hýsa fangana.

Stjórnvöld í Kósóvó segja að fjármunirnir verði notaðir til að bæta fangelsi í Kósóvó og til að fjárfesta í verkefnum tengdum endurnýjanlegri orku.

Sendir skýr skilaboð til útlenskra afbrotamanna

„Þetta er nauðsynlegt til að tryggja fleiri dönsk fangelsispláss og hjálpar til við að koma aftur á jafnvægi í fangelsiskerfinu,“ sagði Peter Hummelgaard, dómsmálaráðherra Danmerkur, eftir að kósóvóska þingið samþykkti samninginn.

„Jafnframt sendir þetta útlenskum afbrotamönnum skýr skilaboð um að framtíð þeirra sé ekki í Danmörku og því eigi þeir ekki að afplána hér,“ sagði Peter.

Búist er við því að hægt verði að byrja senda fangana til Kósóvó eftir um það bil tvö ár.

Guðrún segir sjálfsagt að skoða svona úrræði

28% þeirra sem afplánuðu dóm á Íslandi árið 2023 voru er­lend­ir rík­is­borg­ar­ar og hef­ur sú tala aldrei verið hærri.

„Það hef­ur ekki komið til sér­stakr­ar skoðunar í dóms­málaráðuneyt­inu að semja við önn­ur ríki um að hýsa fanga með er­lend­an rík­is­borg­ara­rétt, og eng­in kostnaðargrein­ing hef­ur farið fram á slíku úrræði hingað til,“ sagði Guðrún í svari við fyrirspurn mbl.is og hélt áfram:

„Hins veg­ar finnst mér sjálfsagt að skoða slík úrræði, enda er ljóst að sí­fellt fleiri lönd eru far­in að skoða þenn­an mögu­leika, í ljósi auk­ins þrýst­ings á fang­elsis­kerf­in um all­an heim. Sér­stak­lega í til­fell­um fanga sem komu hingað til lands í þeim eina til­gangi að stunda glæpi og hafa eng­in önn­ur tengsl við Ísland.“

Á Íslandi eru á þriðja hundrað manns á boðun­arlista til afplán­un­ar fulln­ustu refs­inga.

Frétt af mbl.is

75% gæsluvarðhaldsfanga voru útlendingar

Guðrún Hafsteinsdóttir dómsmálaráðherra. mbl.is/Óttar

• Blogga um frétt