Samtökin Hisbollah sögðust í morgun hafa skotið flugskeyti í átt að ísraelsku borginni Tel Aviv. Ísraelsher segir árásina fordæmalausa.

Loftvarnarflautur ómuðu í Tel Aviv eftir að flugskeytinu var skotið á loft, að sögn Ísraelshers, sem bætti því við að hann hefði skotið það niður yfir borginni.

Þetta er í fyrsta sinn sem Hisbollah lýsa yfir ábyrgð á flugskeytaárás síðan samtökin hófu næstum árslanga bardaga sína við Ísrael eftir að samherjar þeirra í Hamas-samtökunum réðust á Ísrael 7. október.

Talsmaður Ísraelshers sagði við AFP að þetta væri einnig „í fyrsta sinn frá upphafi“ sem flugskeyti frá Hisbollah kemst inn á svæði Tel Aviv.

Höfuðstöðvar Mossad skotmarkið

Höfuðstöðvar ísraelsku leyniþjónustunnar Mossad í útjaðri Tel Aviv voru skotmarkið, að sögn Hisbollah.

„Þessar höfuðstöðvar eru ábyrgar fyrir aftökum leiðtoga og sprengingum á símboðum og þráðlausum tækjum,“ sagði í yfirlýsingu Hisbollah. Áttu samtökin þar við árásir í síðustu viku þar sem margir voru drepnir, þar á meðal háttsettur leiðtogi þeirra.

Einnig sagði í yfirlýsingunni að árásin hefði verið gerð til stuðnings almenningi á Gasasvæðinu og „til varnar Líbanon og fólkinu þar“.

Gígur í Jiyeh í Líbanon eftir loftárás Ísraela. AFP/Mahmoud Zayyat

Áframhaldandi árásir á Líbanon

Í suðurhluta Líbanons, þar sem vígi Hisbollah-samtakanna er, héldu herþotur Ísraela áfram í morgun loftárásum sínum á þorp, þriðja daginn í röð. Loftárásir þeirra fyrr í vikunni urðu að minnsta kosti 558 manns að bana.

Þrír voru drepnir í árás Ísraela á þorp norður af Beirút, höfuðborg Líbanons, að sögn heilbrigðisráðuneytis Líbanons.

Tengdar fréttir

Ísrael/Palestína

Tveir lögreglumenn drepnir á Gasa

• Lýsa „algjörri andstöðu“ við brottflutning Gasabúa
• Þremur ísraelskum gíslum sleppt
• Hamas segjast munu sleppa gíslum
• Danir leggja til 200 milljónir aukalega

» Fleiri tengdar fréttir

• Blogga um frétt