Harris kaupir ís á meðan Trump kaupir McDonald's
Setja bókamerki
Um það bil 163,6 milljörðum króna hefur verið varið í kosningabaráttu forsetaframbjóðenda vestanhafs það sem af er ári og enn er rúmlega mánuður til kosninga. Útlagður kostnaður framboðanna kennir ýmissa grasa.
Dagblaðið Wall Street Journal hefur tekið saman kostnað framboðanna og pólitískra aðgerðanefnda (PAC) þeim tengdum. Er miðað við frá ársbyrjun og út ágúst.
Kostnaður framboðs Kamölu Harris og Joe Bidens er tekinn saman þar sem um „sömu kennitölu“ er að ræða, en hún tók við kosningasjóðum Bidens. Hér eftir verður talað um framboð Harris.
Harris varið mun meiri pening
Harris-framboðið hefur hingað til eytt um 104 milljörðum króna, sem er umtalsvert meira en framboð Donalds Trumps hefur eytt. Hjá Trump nemur kostnaður tæplega 60 milljörðum króna.
Kosningateymi Harris og PAC sem styðja hana hafa það sem af er ári safnað 153,8 milljörðum króna.
Á sama tíma hafa Trump og PAC sem styðja hann safnað 101 milljarði króna.
Ekki er tekið með hvað framboðin hafa safnað í þessum mánuði en það eru líklega umtalsverðar fjárhæðir.
Auglýsingakostnaður vegur þyngst
Hjá báðum framboðum fer langmesti peningurinn í auglýsingar í sjónvarpi, útvarpi, pósti og samfélagsmiðlum. Harris hefur varið 48,4 milljörðum króna í auglýsingar sem er rúmlega tvöfalt meira en Trump.
Þá hefur Harris varið rúmlega 10 milljörðum króna í launakostnað og ráðgjöf á árinu á sama tíma og Trump hefur varið um 4,9 milljörðum króna í slíkt.
Ýmis önnur útgjöld fara svo í lögfræðikostnað – Trump hefur varið tvöfalt meira í það en Harris – viðburði, kannanir, ferðakostnað og margt annað.
Í YouTube-myndskeiðunum sem fylgja fréttinni má sjá dæmi um tvær nýjar auglýsingar frá framboðunum.
Trump eytt þremur milljónum í McDonald's
En starfsmenn framboðanna eru greinilega með mismunandi smekk þegar kemur að mat.
Framboð Trumps hefur eytt 10 milljónum króna í skyndibita – þar af rúmlega þremur milljónum í McDonald's – á sama tíma og framboð Harris hefur varið 2,8 milljónum króna í skyndibita.
Aftur á móti hefur framboð Harris varið 28,6 milljónum króna í fínni veitingastaði á meðan framboð Trumps hefur varið um 7,7 milljónum króna í slíkt.
Athygli vekur að framboð Harris varði 5,6 milljónum króna í ísbúðir í ágúst.
Kosningarnar fara fram 5. nóvember og ljóst er að mun meiri fjármunum á eftir að vera varið í baráttuna hjá báðum frambjóðendum.
Segja leiðtoga Hisbollah látinn
Vélarbilun hjá Play riðlar vöktum slökkviliðsins
Sláandi lítill munur á fylgi Trump og Harris
Dapurleg framkoma í nótt: Sumir reyndu oftar en þrisvar
„Er ég virkilega að deyja?“
Harris kaupir ís á meðan Trump kaupir McDonald's
Vissi ekkert hvað hún var að gera