„Harðir þjóðernishyggjuflokkar á mikilli siglingu“

Eiríkur Bergmann, prófessor í stjórnmálafræði við Háskólann á Bifröst, segir að sögulegur sigur Frelsisflokksins í austurrísku þingkosningum í gær hafi ekki komið sér á óvart.

Þetta er í fyrsta skipti sem flokkurinn sigrar í kosningum frá stofnun hans árið 1956. Flokkurinn, sem er hægriþjóðernisflokkur, bætti við sig 25 þingsætum og fékk 56 þingmenn kjörna af 183.

Frétt af mbl.is

Sögulegur sigur Frelsisflokksins

„Við vorum búin að sjá aðdragandann að þessu í einhvern tíma. Þetta er í takt við þá þróun sem hefur verið lengi að mjög harðir þjóðernishyggjuflokkar sverja sig í ætt við þjóðernis hugmyndir fyrri tíma og eru á mikilli siglingu,“ segir Eiríkur við mbl.is.

Eiríkur Bergmann, prófessor í stjórnmálafræði við Háskólann á Bifröst. mbl.is/Kristófer Liljar

Eiríkur segir þjóðernishyggjuflokkar hafi notið mikil stuðnings í nokkrum löndum og þar á meðal í Austurríki. Hann segir að Austurríkismenn hafi verið mjög mótækilegir fyrir skilaboðum af þessum toga um langa hríð.

Harður þjóðernishyggjuflokkur

„Frelsisflokkurinn er harður þjóðernishyggjuflokkur sem er mjög ákafur í andstöðu við aðkomufólk og sækir fylgi sitt fyrst og fremst út á það,“ segir Eiríkur.

Fyrsti leiðtogi Frelsisflokksins var Anton Reinheller sem áður var í Nasistaflokknum og var einnig í SS-sveit nasista. Formaður flokksins í dag er Herbert Kickl sem hefur notið mikilla vinsælda að undanförnu.

Þrátt fyrir sigurinn í þingkosningum er ekki talið líklegt að flokkurinn geti náð meirihlutasamstarfi.

• Blogga um frétt