Erlent | AFP | 1.10.2024 | 6:42 | Uppfært 10:20

Segjast hafa skotið á hermenn í Ísrael

Þessi ljósmynd sem var tekin í norðurhluta Ísraels við landamærin að suðurhluta Líbanons sýnir eld sem kviknaði eftir árás Ísraela. AFP/Jalaa Marey

Hisbollah-samtökin segjast hafa skotið á Ísraelsher í ísraelska landamærabænum Metula í morgun.

Frétt af mbl.is

Ísrael sendir herlið inn í Líbanon

Fram kemur í tilkynningu samtakanna að flugskeytum hafi verið skotið þangað. 25 mínútum fyrr hófu þeir stórskotahríð á sama svæði.

Reykur í suðurhluta Líbanons eftir árás Ísraela. AFP/Etienne Torbey

Að sögn Ísraelshers voru flugskeytin um fimm talsins og náðist að skjóta niður einhver þeirra. Einhver „brotlentu“ á meðan önnur „féllu á opin svæði“, að því er BBC greindi frá.

Frétt af mbl.is

Sammála um hernaðaraðgerðir í Líbanon

Ísraelsher lýsti því yfir í gær að svæðin í kringum Metula, Misvag Am og Kfar Giladi í norðurhluta Ísraels væru „lokuð hernaðarsvæði“ og var fólki meinaður aðgangur þangað.

Metula í norðurhluta Ísraels. AFP/Anwar Amro

Ísrael sendi herlið inn í Líbanon seint í gærkvöldi. Herinn sagði aðgerðirnar beinast að ákveðnum skotmörkum, þorpum í suðurhluta landsins, nálægt landamærunum.

95 drepnir í gær

Um 95 manns voru drepnir og 172 særðust í loftárásum Ísraela víðs vegar um Líbanon í gær, að sögn heilbrigðisráðuneytis Líbanons.

Embættismenn segja að yfir 1.000 manns hafi verið drepnir í landinu á síðustu tveimur vikum. Hugsanlegt er að hátt í ein milljón hafi þurft að yfirgefa heimili sín.