Gæsluvarðhald hefur verið framlengt um tvær vikur yfir fimmtán ára pilti að kröfu lögreglunnar í Stokkhólmi í Svíþjóð eftir að hann skaut skólabróður sinn í Trångsundsskolan 4. september í haust í bænum Trångsund, suður af höfuðborginni.

Undirbýr Kajsa Lindberg saksóknari nú ákæru fyrir tilraun til manndráps en talið er að grunaði hafi lagt á ráðin í þrjá daga um að stytta skólabróður sínum aldur áður en hann lét til skarar skríða.

Augljós tilraun til manndráps

Dró hann skammbyssuna upp þegar hann og fórnarlambið voru einir í lokuðu rými í skólabyggingunni, beindi henni að skólabróður sínum og hleypti af áður en hann forðaði sér af vettvangi. Hinn hlaut alvarleg sár af en náði að leita sér hjálpar og lítur saksóknari á háttsemina sem augljósa tilraun til manndráps.

Hafði lögregla hendur í hári piltsins þegar eftir atburðinn og hefur hann verið í haldi síðan. „Starf okkar er þess eðlis að hætta er á að sönnunargögnum verði spillt gangi grunaði laus,“ segir Lindberg við TT-fréttastofuna.

Þrátt fyrir allt sem gengið hefur á í Svíþjóð síðustu misseri eru skotárásir í skólum þar nær óþekktar, en engu að síður segir Lena Ljungdahl öryggissérfræðingur við sænska ríkisútvarpið SVT að árásin hafi ekki komið henni sérstaklega á óvart. „Við þessu mátti nánast búast,“ segir Ljungdahl án þess að rökstyðja mál sitt nánar við ríkisútvarpið.

SVT

SVT-II (rætt við Ljungdahl)

Tengdar fréttir

Óöld í Svíþjóð

Þekktur tónlistarmaður myrtur

• Sænsk bölmenni lögðu á ráðin um dráp
• Þyngstu dómarnir miðað við aldur
• Piltar teknir með skotvopn og sprengiefni í Malmö
• Manndráp orðin pöntunarvara

» Fleiri tengdar fréttir

• Blogga um frétt