Úkraínskar hersveitir hafa tekið rúmlega 700 rússneska hermenn höndum síðan þær réðust inn í Kúrskhéraðið rússneska í ágúst. Frá þessu greina stjórnvöld í Kænugarði í dag.

Að sögn Oleksandr Syrsky, yfirmanns úkraínska heraflans í Kúrsk, hafa hans menn alls handtekið 717 rússneska hermenn í héraðinu, en sókn Úkraínumanna þangað í ágústbyrjun kom Rússum í opna skjöldu. Lét Volódimír Selenskí Úkraínuforseti þau orð falla á sínum tíma að tilgangur innrásarinnar væri að handsama fleiri rússneska stríðsfanga svo hafa mætti skipti á þeim og úkraínskum hermönnum í fangelsum rússneska hersins.

Norðurkóreskir hermenn í Kúrsk

Hafa nágrannaríkin oftsinnis skipst á stríðsföngum þau tæpu þrjú ár sem innrásarstríð Rússa í Úkraínu hefur nú staðið.

Heyrist því nú fleygt á lýðnetinu, hvort tveggja frá almenningi og hernaðarlegum yfirmönnum rússneskum að rússneskum hersveitum hafi orðið nokkuð ágengt við að hrekja sókn Úkraínumanna inn í Kúrsk.

Stjórnvöld í Kænugarði greindu enn fremur frá því að úkraínskir hermenn hefðu nú fyrsta sinni átt í skærum við norðurkóreska hermenn sem staddir væru í Kúrsk en ekki er langt síðan fréttir voru fluttar af því að þúsundir hermanna frá Norður-Kóreu væru komnir til Rússlands og gengjust þar undir þjálfun með það fyrir augum að verða Rússum liðsauki á vígvellinum.

Tengdar fréttir

Úkraína

Fimmtán ára fangelsi fyrir að aðstoða Rússa

• Fagnar sigri Sandu og vill sameinaða Evrópu
• Sigur Trumps neyði Evrópu til að breyta um stefnu
• Standa með Rússum þar til sigur vinnst
• Vísindamaður grunaður um að aðstoða Rússa

» Fleiri tengdar fréttir

• Blogga um frétt