Erlent | AFP | 6.11.2024 | 13:54

Þúsundir Ísraela mótmæla brottrekstri Gallants

Þúsundir Ísraela mótmæltu því á götum úti í gærkvöldi að Benjamín Netanjahú forsætisráðherra hefði vikið varnarmálaráðherra landsins úr embætti.

Mótmælendur kröfðust þess að stjórnvöld gerðu allt sem í þeirra valdi stæði til að flytja heim þá gísla sem enn eru í haldi Hamas á Gasaströndinni.

Mótmælin brutust út skömmu eftir að forsætisráðuneytið tilkynnti um brottrekstur Yoavs Gallants varnarmálaráðherra á þriðjudag í kjölfar ágreinings meðal almennings um stríðið á Gasa.

Gallant, sem hefur reynt að beita sér fyrir vopnahléi gegn lausn gísla á Gasa, var leystur af störfum á sama tíma og forsetakosningar stóðu yfir í Bandaríkjunum í Bandaríkjunum, en Bandaríkjamenn eru einn helsti stuðningsmaður Ísraelsmanna í hernaðarmálum.

Frétt af mbl.is

Varnarmálaráðherra Ísraels rekinn

Yoav Gallant hafði talað fyrir vopnahlé á Gasaströndinni gegn lausn ísraelskra gísla í haldi Hamas. Í gær var hann rekinn úr ríkisstjórninni. AFP

Við eigum skilið betri leiðtoga“

Netanjahú og Gallant hafa oft deilt um hefndaraðgerðir Ísraela gegn Hamas-samtökunum í kjölfar hryðjuverkaárásar herskárra Palestínumanna í Ísrael hinn 7. október 2023.

„Undanfarna mánuði hefur traust minnkað. Í ljósi þessa ákvað ég í dag að binda enda á kjörtímabil varnarmálaráðherrans,“ sagði Netanjahú á skrifstofu sinni og bætti við að utanríkisráðherrann Israel Katz tæki við af honum.

Stuttu síðar flykktust þúsundir manna út á götur í Tel Aviv og mótmæltu Netanyahu og kröfðust þess að þeir 97 gíslar, sem enn er haldið á Gasa, yrðu sendir heim.

Mótmælendur lokuðu fyrir umferð og kveiktu elda, sumir voru í bolum sem vísuðu til gíslanna.

Þeir héldu uppi skiltum með slagorðum á borð við „Við eigum skilið betri leiðtoga“ og „Skiljum engan eftir!“. Einn mótmælandi var með jafnvel handjárn um úlnliðina og andlitsgrímu sem líktist Netanjahú.