Erlent | mbl | 13.11.2024 | 23:47

Flytur líklega ekki í Hvíta húsið

Donald Trump verðandi forseti Bandaríkjanna ásamt eiginkonu sinni, Melaniu Trump. AFP

Melania Trump, eiginkona verðandi forseta Bandaríkjanna Donalds Trumps, mun að öllum líkindum ekki flytja í Hvíta húsið með eiginmanni sínum er hann tekur við embætti forseta.

Samkvæmt heimildum CNN standa viðræður enn yfir um hvar verðandi forsetafrúin muni dvelja næsta kjörtímabil.

Afþakkaði boð í Hvíta húsið

Athygli vakti þegar Melania Trump ákvað að taka ekki þátt í formlegri heimsókn í Hvíta húsið í dag.

Jill Biden forsetafrú hafði boðið verðandi forsetafrúnni í heimsókn, samhliða því sem eiginmenn þeirra funduðu, en Melania afþakkaði.

Heimildarmenn segja að hún hafi verið vant við látin en hún er sögð hafa verið á viðburði í tengslum við bók sem hún var að gefa út.

Verður viðstödd stóra viðburði

Ákvörðun Melaniu Trump um að fylgja manninum sínum ekki í heimsóknina í dag og hugsanlega að flytja ekki í Hvíta húsið er talin gefa til kynna að hún muni hafa meira sjálfræði sem forsetafrú á komandi kjörtímabili.

Heimildarmenn sem CNN ræddi við telja að verðandi forsetafrúin ætli að verja mestum tíma í New York og Flórída, þar sem fjölskylda hennar og vinir eru búsettir.

Aftur á móti tóku þeir fram að hún yrði viðstödd stóra viðburði en að hún myndi jafnframt koma fram á sínum eigin forsendum og leggja áherslu á þau mál er hún teldi mikilvæg.