Erlent | Morgunblaðið | 3.12.2024 | 7:51

Lýsa yfir stuðningi sínum við Assad

Sýrlenskir uppreisnarmenn taka hér sjálfu af sér við eina af þyrlum stjórnarhersins sem þeir handsömuðu í sókn sinni að Aleppó um helgina. AFP/Aaref Watad

Vladimír Pútín Rússlandsforseti og Masoud Pezeshkian Íransforseti lýstu í gær yfir ótakmörkuðum stuðningi sínum við Bashar al-Assad Sýrlandsforseta og þær aðgerðir sem Sýrlandsstjórn ætlar að gera til þess að endurheimta það landsvæði sem uppreisnarmenn tóku um helgina í norðvesturhluta landsins.

Frétt af mbl.is

Kínverjar heita stuðningi við Sýrland

Pútín og Pezeshkian ræddu stöðuna í Sýrlandi símleiðis í gær og sammæltust þar meðal annars um nauðsyn þess að vera í samskiptum við tyrknesk stjórnvöld, en þau hafa staðið við bakið á sumum uppreisnarhópum í Sýrlandi á síðustu árum.

Símtal þeirra kom í kjölfar þess að Assad leitaði eftir stuðningi bandamanna sinna í Rússlandi og Íran á sunnudaginn, eftir að uppreisnarhópurinn Hayat Tahrir al-Sham, HTS, náði Aleppó, næststærstu borg Sýrlands, á sitt vald um helgina.

Skutu eldflaugum á Hama

Rússar hafa gert nokkrar loftárásir á Aleppó og nágrenni til stuðnings stjórnarhernum, og sagði varnarmálaráðuneyti Rússlands í tilkynningu að herinn væri að aðstoða við að halda aftur af „hryðjuverkamönnum“ í Idlib-, Hama-, og Aleppó-héruðum Sýrlands.

Stjórnarher Sýrlands hefur safnað liði í borginni Hama, sem er um 230 kílómetrum sunnan við Aleppó. Uppreisnarmenn skutu eldflaugum á borgina í gær og voru sex óbreyttir borgarar sagðir hafa farist í árásinni.

Vígasveitir í Írak á vegum Írana voru sendar um helgina yfir landamæri Íraks til Sýrlands til þess að aðstoða stjórnarherinn í bardögum við uppreisnarmenn HTS. Óstaðfestar fregnir um helgina hermdu að Bandaríkjaher hefði gert loftárásir á hluta sveitanna þegar þær voru á leiðinni til Sýrlands.

Utanríkisráðherrar Tyrklands og Írans, þeir Hakan Fidan og Abbas Araghchi, funduðu í gær í Ankara höfuðborg Tyrklands og ræddu stöðuna í Sýrlandi. Fidan hafnaði þar því að erlend ríki bæru ábyrgð á sókn uppreisnarmanna, en íranskir fjölmiðlar höfðu haldið því fram að Tyrkir væru á bak við sókn HTS að Aleppó.