Pelosi hrasaði niður tröppur og mjaðmabrotnaði

Nancy Pelosi, fulltrúadeildarþingmaður demókrata og fyrrverandi forseti fulltrúadeildarinnar, hrasaði niður stiga og datt harkalega í jörðina í Lúxemborg fyrr í dag með þeim afleiðingum að hún mjaðmabrotnaði.

Pelosi var í opinberri heimsókn til þess að minnast þess að 80 ár eru liðin frá bar­dag­anum við Ardennes í Belg­íu, The Battle of the Bulge, þar sem 19 þúsund banda­rísk­ir her­menn féllu á rúm­um mánuði.

„Nancy Pelosi, fyrrverandi forseti fulltrúadeildarinnar, hlaut meiðsli á viðburði og var lögð inn á sjúkrahús fyrir nánari skoðun,“ sagði Ian Krager, talsmaður Pelosi, í yfirlýsingu og bætti við að hún væri að fá frábæra umönnun.

Féll harkalega í jörðina

Í yfirlýsingunni var ekki greint frá slysinu en bandarískir fjölmiðlar greina frá því að hún hafi hrasað niður marmaratröppur og fallið harkalega í jörðina með þeim afleiðingum að hún mjaðmabrotnaði.

Bandamenn Pelosi í Kaliforníu og í Washington D.C. sögðu við dagblaðið New York Times að læknar væru þess fullvissir að hægt væri að laga brotið með hefðbundinni aðgerð.

• Blogga um frétt