Þakklátir og ánægðir með heimkomuna

Meðlim­ir ástr­alska fíkni­efna­hrings­ins Bali Nine eru ánægðir með að vera komnir heim til Ástralíu eftir að hafa dvalið í 19 ár í fangelsi í Indó­nes­íu. Mennirnir sneru heim í gær.

Indó­nes­íska lög­regl­an hand­tók níu Ástr­ala árið 2005 og sak­felldi þá fyr­ir að hafa reynt að smygla meira en átta kíló­um af heróíni frá eyj­unni Balí. Málið vakti heims­at­hygli á sín­um tíma vegna strangr­ar fíkni­efna­lög­gjaf­ar í Indó­nes­íu.

Frétt af mbl.is

Komnir heim eftir 19 ár í fangelsi

Allir meðlimir hópsins hlutu þunga dóma. Höfuðpaur­ar hópsins voru teknir af lífi árið 2015, þrátt fyrir ítrekaðar beiðnir frá áströlskum stjórnvöldum um að þeir fengju að lifa. Einn meðlimur hópsins lést í fangelsi árið 2018 og einu konunni í hópnum var sleppt úr fangelsi árið 2018 eftir að dómur hennar var mildaður.

Meðlimir Bali Nine voru handteknir árið 2005. Efri röð frá vinstri: Myur­an Sukumar­an, Scott Rush, Tach Duc Thanh Nguyen og Renae Lawrence. Neðri röð frá vinstri: Si Yi Chen, Matt­hew Norm­an, Michael Czugaj, Mart­in Stephen og Andrew Chan AFP/​Jewel Samada

Yfirvöld í Ástralíu hafa lengi barist fyrir því að fá mennina fimm heim. Í gær varð það að veruleika vegna samkomulags milli ríkjanna. Mennirnir munu ekki þurfa að afplána frekari fangelsisvist í Ástralíu.

Ant­hony Al­banese, for­sæt­is­ráðherra Ástr­al­íu, greindi frá samkomulaginu í gær. Hann þakkaði Pra­bowo Su­bianto, for­seta Indó­nes­íu, fyr­ir sam­starfið. 

„Þess­ir Ástr­al­ar eyddu meira en 19 árum í fang­elsi í Indó­nes­íu. Það var kom­inn tími fyr­ir þá að koma heim,“ sagði Al­banese.

Í þessu fangelsi í Indónesíu dvöldu mennirnir. AFP/Sonny Tumbelaka

Þakka forseta Indónesíu

Í yfirlýsingu sem var gefin út fyrir hönd fimmmenninganna segir: „Mönnunum fimm er létt og þeir eru ánægðir að vera komnir aftur til Ástralíu.“ 

Þá hlakki þeir til að leggja sitt af mörkum til samfélagsins. Í yfirlýsingunni þakka þeir jafnframt Prabowo Subianto, forseta Indónesíu, fyrir að leyfa þeim að snúa heim. Einnig hafi stuðningur frá vinum, fjölskyldu, lögfræðingum og embættismönnum verið „nauðsynlegur og ómetanlegur“.

• Blogga um frétt