Lýsa yfir neyðarástandi vegna olíuleka

Yfirvöld í bænum Anapa í Rússlandi, sem liggur við Svartahaf, hafa lýst yfir neyðarástandi vegna olíuleka. Olían lekur úr tveimur skemmdum olíuflutningaskipum og hefur skolað upp á land. 

Skipin skemmdust í aftakaveðri á sunnudaginn. Annað þeirra sökk eftir að hafa klofnað í tvennt á meðan hitt skipið skemmdist mjög mikið og strandaði. 

AFP

Einn lést og 26 bjargað

Einn skipverji lést af völdum ofkælingar en 26 var komið til bjargar að sögn rússneskra stjórnvalda.

Bæjarstjórn Anapa birti tilkynningu á Telegram þar sem greint er frá stöðu málsins og að lýst hafi verið yfir neyðarástandi. Tekið er fram að hreinsunarstarf sé þegar hafið. 

Um 90.000 manns búa í bænum sem er í suðurhluta Krasnodar-héraðs, sem er skammt frá Krímskaga.

AFP

Olía dreifst um 30 km langa strandlengju

Ráðherra almannavarna á svæðinu segir að um 30 km langur kafli strandlengjunnar sé nú þakinn olíu. 

Um 400 viðbragðsaðilar hafa verið sendir á vettvang til að taka þátt í hreinsunarstarfinu. 

Anapa er strandbær við Svartahaf. Kort/Google

• Blogga um frétt