Tók þrjár mínútur að drepa fimm og særa 200
Setja bókamerki
Það tók Taleb Jawad al Abdulmohsen aðeins 3 mínútur að drepa að minnsta kosti fimm og særa 200 manns er hann ók svartri BMW-bifreið í mannfjölda á jólamarkaði í Magdeburg í Þýskalandi í gærkvöldi. Spiegel greinir frá.
Af þeim 200 sem eru slasaðir er 41 talinn alvarlega slasaður, að sögn Ronni Krug, borgarfulltrúa Magdeburg.
Al Abdulmohsen nýtti sér flótta- og björgunarleiðir á jólamarkaðnum til þess að komast akandi inn í mannfjöldann, að sögn Toms Olivers Langhans, yfirlögregluþjóns í Magdeburg.
Segir hann jafnframt að það hafi tekið árásarmanninn þrjár mínútur að valda þessum gífurlega mikla skaða. Hann er talinn hafa verið einn að verki.
Horst Nopens saksóknari segir að Al Abdulmohsen hafi þegar sagt ástæðu árásarinnar hafa verið óánægju hans með hvernig farið sé með sádí-arabíska flóttamenn í Þýskalandi.
Dvaldi nálægt jólamarkaðnum
Al Abdulmohsen er frá Sádí Arabíu og er menntaður læknir. Kom hann fyrst til Þýskalands árið 2006 og stundaði þá sérnám í læknanámi sínu og starfaði sem læknir að því loknu.
Spigel hefur það eftir heimildum sínum að hann hafi dvalið í nokkurn tíma síðustu tvo mánuði á hóteli nálægt jólamarkaðnum í Magdeburg.
Andvígur íslamstrú
Nancy Faeser, innanríkisráðherra Þýskalands , segir að Al Abdulmohsen sé andvígur íslamstrú þrátt fyrir að vera alinn upp í trúnni.
Hann skrifaði bók sem bar heitið Skapandi afneitun Íslams. Reyndi hann að gefa hana út með hjálp hópfjármögnunarherferðar við litlar undirtektir. Bókin var aldrei gefin út.
Árið 2013 kom upp atvik er varðaði Al Abdulmohsen í sádí-arabíska sendiráðinu í Berlín. Í kjölfarið var honum hótað að vera tekinn af lífi ef hann sneri aftur.
Þetta eru ráðherrar ríkisstjórnarinnar
„Þetta er ríkisstjórn almannahagsmuna“
Skattamál verði líklega „þeirra mesta klemma“
„Tímabil aukinnar eldvirkni“
Ók á hóp fólks á jólamarkaði: Einn látinn
Lát hjóna í Neskaupstað: Ákæra gefin út
