Erlent | mbl | 23.12.2024 | 15:55

Traustur vinur Trumps sakaður um að sofa hjá barni

Matt Gaetz ræðir við blaðamenn fyrir utan þinghúsið. AFP/Saul Loeb

Matt Gaetz, traustur stuðningsmaður Donalds Trumps og fyrrverandi þingmaður í bandarísku fulltrúadeildinni, er sakaður um að hafa „reglulega“ borgað fyrir kynlíf, neytt ólöglegra eiturlyfja og stundað kynlíf með 17 ára stúlku, samkvæmt því sem kemur fram í skýrsludrögum frá siðanefnd fulltrúadeildarinnar.

Í skýrslunni kemur fram að meintar gjörðir Gaetz – sem Trump, verðandi Bandaríkjaforseti, hafði ætlað sér að skipa sem dómsmálaráðherra áður en Gaetz hætti við – hafi framið kynferðisbrot, þ. á m. brotið gegn lögum um nauðgun í Flórídaríki, og brotið gegn lögum fulltrúadeildarinnar. New York Times greinir frá.

Frétt af mbl.is

Hættir við að reyna að verða ráðherra Trumps

Þó tekur nefndin fram í drögum sínum að hún hafi ekki fundið fullnægjandi sönnunargögn sem bentu til þess að Gaetz hefði brotið lög um kynlífsmansal.

Trump hafði tilkynnt í nóvember að hann hygðist tilnefna Gaetz sem dómsmálaráðherra en þær ráðagerðir hafa mætt nokkurri andstöðu, ekki síst þar sem Gaetz hafði verið sakaður um að greiða sautján ára stúlku fyrir kynlíf í Flórída, sem samkvæmt lögum ríkisins yrði talið sem nauðgun. Gaetz hætti því við að sækjast eftir útnefningu í embættið.

Kókaín og e-pillur

Í skýrslunni kemur fram að á árunum 2017-2020 hafi Gaetz „reglulega borgað konum fyrir að eiga við sig kynmök“ og árið 2017 „átt kynmökum við 17 ára stúlku“.

Þá segir enn fremur að Gaetz hafi í mörgum tilvikum haft ólögleg eiturlyf í vörslu sinni og neytt þeirra, þar á meðal kókaín og alsælu.

Búist er við því að skýrslan verði gefin út í dag, en í drögunum kemur fram að formaður nefndarinnar, sem er samflokksmaður Gaetz í Repúblikanaflokkunm, hafi mælt gegn birtingu hennar.