Kosið í febrúar: AFD stærri en flokkur Scholz

Kristilegir demókratar eru með langmesta stuðninginn í Þýskalandi og þjóðernisflokkurinn Alternative für Deutschland (AfD) mælist með meiri stuðning en Verkamannaflokkur Olaf Scholz.

Frank-Walter Steinmeier, for­seti Þýska­lands, hef­ur leyst upp sam­bandsþingið og Þjóðverj­ar munu því ganga til kosn­inga þann 23. fe­brú­ar 2025.

Þetta ger­ist í kjöl­far þess að rík­is­stjórn Ol­afs Scholz kansl­ara sprakk í síðasta mánuði og van­traust var samþykkt á hend­ur Scholz fyrr í des­em­ber.

Frétt af mbl.is

Forseti Þýskalands leysir upp þingið

Verkamannaflokkurinn mælist með 17%

Politico tekur saman meðaltal kannanna í Þýskalandi og samkvæmt því þá eru Kristilegir Demókratar með 31% stuðning og AFD með 19% stuðning. Báðir flokkar eru hægra megin við miðjuna á hinum pólitíska ás en þó er ólíklegt að AFD fengi að fljóta með í ríkisstjórn.

Verkamannaflokkurinn, sem leiddi ríkisstjórnina sem sprakk í síðasta mánuði, myndi gjalda afhroð í kosningum en hann mælist með 17% stuðning. Í síðustu kosningum fékk hann 25,7%.

Flokk­ur frjáls­lyndra demó­krata sleit stjórn­ar­sam­starf­inu í nóv­em­ber, eft­ir að Scholz rak Christian Lindner fjár­málaráðherra úr embætti, og flokkurinn mælist aðeins með 4% fylgi núna.

Útlendingamál og efnahagsmál í brennidepli

Græningjar, sem einnig voru í ríkisstjórninni, mælast með 13% fylgi en þeir fengu tæplega 15% í síðustu kosningum.

BSW, sem er klofningsframboð frá Vinstriflokknum, mælist með 6% fylgi og Vinstriflokkurinn mælist með 3% fylgi.

Miðað við kannanir núna þá bendir allt til þess að Friedrich Merz, leiðtogi Kristilegra demókrata, verði kanslari en flokkurinn þyrfti að mynda ríkisstjórn með að minnsta kosti einum öðrum flokki.

Í frétt ABC segir að meðal lykilmála í kosningunum séu útlendingamál, efnahagsmál og stuðningur við Úkraínu. 

• Blogga um frétt