Tugir manna látnir eftir öflugan jarðskjálfta í Tíbet

Staðfest hefur verið að minnsta kosti 53 hafi látist og 62 séu slasaðir eftir að stór jarðskjálfti reið yfir fjalllendi í Tíbet í nótt.

Kínverskir ríkisfjölmiðlar greindu frá þessu en jarðskjálftinn reið yfir klukkan 9 að staðartíma og var hann 7,1 að stærð. Jarðskjálftinn átti upptök sín á um tíu kílómetra dýpi við Himalaya-fjöll nærri landamærum Nepal samkvæmt upplýsingum frá bandarísku jarðfræðistofnuninni en margir minni eftirskjálftar mældust.

Skjálftinn fannst einnig í nágrannaríkinu Nepal og hlutum Indlands en jarðskjálftar eru algengir á svæðinu sem liggur á stórri jarðfræðilegri misgengislínu.

53 eru látnir og tugir manna eru slasaðir. AFP

Yfirvöld í Kína segja að skjálftinn hafi mælst 6,8 að stærð og að á annað þúsund hús hafi stórskemmst. Víða er rafmagnslaust og margir vegir eru illa farnir.

Forseti Kína, Xi Jinping, hefur hvatt til allsherjar leitar- og björgunaraðgerða til að lágmarka mannfall.

Árið 2015 varð jarðskjálfti sem mældist 7,8 stig nærri Kathmandu, höfuðborg Nepal. Næstum 9.000 manns biðu þá bana og yfir 20.000 slösuðust.

• Blogga um frétt