Carter lagður í þinghúsið

Jarðneskar leifar Bandaríkjaforsetans fyrrverandi, Jimmys Carters, voru í gær fluttar með viðhöfn á vegum hersins til þinghússins Capitol Hill í höfuðborginni Washington þar sem þær munu hvíla þar til formleg útför á vegum ríkisins verður gerð á morgun, fimmtudag.

Er gert ráð fyrir að allir fjórir fyrrverandi Bandaríkjaforsetarnir, sem á lífi eru, Bill Clinton, George W. Bush, Barack Obama og Donald Trump, sæki útför Carters, en sá síðasttaldi þeirra, Trump tekur öðru sinni við forsetaembætti síðar í mánuðinum.

Líkkista 39. forseta Bandaríkjanna, Jimmys Carters, í kringlu Capitol Hill-þinghússins. AFP/Allison Robbert

Frétt af mbl.is

Jimmy Carter er látinn

Carter var hundrað ára að aldri þegar hann lést 29. desember en hann gegndi embætti sínu kjörtímabilið 1977 til 1981 og vann ötullega að mannúðarmálum að því loknu – starf sem aflaði honum friðarverðlauna Nóbels árið 2002.

Ekið frá minnismerki um fallna sjóliða

Í beinni sendingu vefmyndavélar á vegum PBS-sjónvarpsstöðvarinnar mátti sjá fjölda fólks ganga gegnum kringlu þinghússins til að votta fyrrverandi forsetanum látna virðingu sína og námu margir staðar og spenntu greipar sínar í þögn.

Frétt af mbl.is

Þjóðarleiðtogar minnast Jimmys Carters

„Ég vottaði Jimmy Carter forseta virðingu mína í dag þar sem hann liggur í þinghúsinu,“ skrifaði Lloyd Austin varnarmálaráðherra á samfélagsmiðilinn X. „Fyrir hönd ráðuneytisins alls sameinumst við fjölskyldu Carters og öllum Bandaríkjamönnum í minningunni um einstakt lífshlaup hans, arfleifð og þjónustu hans við þjóð okkar,“ ritaði ráðherra þar enn fremur.

Borgarar landsins hafa fjölmennt í þinghúsið til að kveðja forseta sinn fyrrverandi og votta honum virðingu. AFP/Jon Cherry

Ók herinn með líkkistu Carters, skrýdda þjóðfána Bandaríkjanna, frá minnismerkinu um fallna sjóliða, US Navy Memorial, að þinghúsinu – sömu leið, en í öfuga átt, miðað við skrúðgönguna sem gengin var við innsetningarathöfn forsetans árið 1977, en Carter gegndi flotaþjónustu á fimmta og sjötta áratug liðinnar aldar, lengst af á kafbátnum SSK-1.

Fyrstur til að ná hundrað ára aldri

Þrettán fyrri forsetar landsins hafa verið lagðir í þinghúsið fyrir útför, Carter sá þrettándi, en Abraham Lincoln var sá fyrsti sem þar var lagður eftir að John Wilkes Booth skaut hann til bana í Ford-leikhúsinu í Washington 14. apríl 1865.

Joe Biden Bandaríkjaforseti hefur lýst yfir þjóðarsorg á morgun, útfarardaginn, og verða ríkisstofnanir lokaðar af því tilefni.

Jimmy Carter er fyrstur Bandaríkjaforseta frá upphafi til að ná hundrað ára aldri.

• Blogga um frétt