Erlent | AFP | 14.1.2025 | 8:23 | Uppfært 9:32

Sakfelling hefði beðið Trumps

Jack Smith saksóknari, sem útnefndur var til að vinna skýrslu um málatilbúnaðinn gegn Trump í kosningasvikamálinu frá 2020, kveður hann hafa hlotið dóm hefði hann ekki náð kjöri í nóvember. AFP/Saul Loeb/Mandel Ngan

Donald Trump, sem í næstu viku sest á ný í forsetastól Hvíta hússins í Washington, hefði hlotið dóm fyrir tilraunir sínar til að hafa áhrif á niðurstöður forsetakosninganna árið 2020 hefði hann ekki náð kjöri í nýafstöðnum kosningum.

Þetta er niðurstaða skýrslu rannsakandans sértilnefnda í málinu, Jack Smith, sem um langt árabil hefur starfað við bandaríska dómsmálaráðuneytið, hvort tveggja sem saksóknari og aðstoðarsaksóknari.

Kjör dragi ekki úr alvarleika brota

Segir Smith í skýrslu sinni að það viðhorf dómsmálaráðuneytisins að ótækt sé að halda uppi saksókn og málarekstri gegn kjörnum forseta dragi ekki úr alvarleika þeirra brota sem Trump séu borin á brýn, gildi sönnunargagna hins opinbera eða málatilbúnaði ákæruvaldsins sem skýrsluhöfundur standi fullkomlega við.

Eykur Smith þeim orðum svo við í skýrslunni, að áður en til kjörs Trumps á nýjan leik hafi komið hafi rannsókn hans þegar leitt til þeirrar niðurstöðu að sönnunargögn gegn forsetanum fyrrverandi og verðandi væru yfrið næg til að knýja fram sakfellingu við málaferli.