Fleiri hundruð þúsund bygginga án rafmagns

Víðfeðmt rafmagnsleysi er á Írlandi þar sem ákafir og sterkir vindar lægðarinnar Jóvinjar hafa valdið umfangsmiklu og fordæmalausu tjóni á rafmagnsinnviðum landsins.

Ofsaveðrið gengur nú yfir Írland og Bretland en mest þykir hættan á Írlandi, Norður-Írlandi og í Skotlandi.

Í tísti írsku veðurstofunnar á X segir að áttatíu ára gamalt vindhviðumet við bæinn Foynes í Limerick-sýslu hafi fallið þegar vindhviða mældist yfir 50,5 metrum á sekúndu.

Hér má fylgjast með lægðinni ganga yfir.

Frétt af mbl.is

Fordæmalaust fárviðri sem gæti orðið sögulegt

Viðgerðir taki marga daga

Yfir 560 þúsund heimili, bóndabæir og fyrirtæki eru án rafmagns. Búast má við að fleiri heimili verði án rafmagns en lægðin gengur norður meðfram norðvesturströnd landsins.

Rauðar og appelsínugular veðurviðvaranir eru í gildi fyrir allt landið og munu vera það fram eftir degi. 

Má búast við að viðgerðir á rafmagnsinnviðum taki marga daga. Ekki verður hægt að leggja mat á tjónið fyrr en lægðin hefur gengið yfir.

Fólk hvatt til að halda sig heima

Skólar, framhaldsskólar og háskólar verða lokaðir í dag, almenningssamgöngur falla niður og flestum læknisheimsóknum hefur verið frestað vegna lægðarinnar.

Þá hefur íbúum verið ráðlagt að vinna að heiman og halda sig þar ef hægt er.

Írska vega­gerðin biðlar til al­menn­ings um að vera alls ekki á ferð á meðan „þetta for­dæma­lausa og lífs­hættu­lega“ ofsa­veður geng­ur yfir.

„Þetta er ekki hefðbund­inn veðurat­b­urður – þetta hef­ur burði til að verða veru­legt og sögu­legt fár­viðri sem stefn­ir lífi fólks í al­var­lega hættu,“ sagði í viðvör­un vega­gerðar­inn­ar í gær.

• Blogga um frétt