Neyðarástand: Merki um landris og þúsundir flýja

Neyðarástandi hefur verið lýst yfir á grísku eynni Santorini. Rúmlega ellefu þúsund manns hafa yfirgefið eyjuna og ferðum með flugi og ferjum hefur verið fjölgað til að anna flóttanum.

Fleiri en 7.700 skjálftar hafa riðið yfir í grennd við eyjuna á aðeins tæpum tveimur vikum.

Sá stærsti til þessa mældist 5,2 að stærð og varð í gær. Þá varð skjálfti af stærðinni 4,8 í dag.

Áhrifin ná víðar í Kýklades-eyjaklasanum, sem á íslensku nefnast Hringeyjar. Þannig hafa skólar á fleiri en tólf eyjum staðið lokaðir í þessari viku til að gæta varúðar.

Mikill fjöldi barnafólks hefur enda ákveðið að fara brott af Santorini til að bíða hrinuna af sér.

Frétt af mbl.is

Þúsundir flýja Santorini

Vísbendingar um landris

Nýjustu mælingar á grundvelli gervihnattagagna benda til þess að land hafi tekið að rísa lítillega á eyjunum umhverfis neðansjávareldfjallið, sem sjá má á kortinu hér að ofan.

Gríska dagblaðið Ta Nea hefur þetta eftir Michalis Foumelis, aðstoðarprófessor við jarðvísindadeild Aristótelesarháskóla í Þessalóníku.

Niðurstöðurnar eru ekki endanlegar og landrisið sem þó mælist er ekki mikið, en það gæti þó gefið til kynna að kvika hafi brotið sér leið upp á minna dýpi. Þar með gætu líkur aukist á eldgosi í grennd við eyjuna.

Segir Foumelis að beðið sé eftir gögnum úr fleiri áttum til að staðfesta að landris hafi átt sér stað.

Fólk bíður þess við höfnina á Santorini að geta farið á brott með ferju. AFP

Eitt stærsta eldgos sögunnar

Santorini er raunar öskjubrún eldfjalls sem liggur falið undir sjávarmáli norðaustur af eynni.

„Þarna var eitt stærsta gos á jörðinni ein­hvern tím­ann á brons­öld, fyr­ir um það bil 3.500 árum, og hafði mjög mik­il á allt Miðjarðar­hafið, sér­stak­lega á Egypta­land og lík­lega Grikk­land og eyj­arn­ar þar í kring,“ sagði Haraldur Sigurðsson, prófessor emeritus í eldfjallafræði, í samtali við mbl.is fyrr í vikunni.

„Eyj­an er eins og hring­ur utan um öskj­una og í gosi á miðöld­um komu upp tvær eyj­ar í öskj­unni, en þarna eru líka mikl­ar forn­minj­ar sem gróf­ust und­ir gos­inu mikla, bæir sem nú er verið að grafa upp und­an 20-30 metra lagi af vikri og ösku sem þeir fóru und­ir. Þannig að mik­il menn­ing­ar­starf­semi er tengd Santor­ini,“ sagði Haraldur.

Eldfjallið nefnist Kolumbo og liggur átta kíló­metra norðaust­ur af Santor­ini.

„Það er neðan­sjáv­ar, en grunnt á því, svona 20-30 metr­ar niður á gíg­brún­ina. Þar hef ég unnið með kaf­báta og rann­sókn­ar­tæki í gígn­um og þar gaus árið 1650. Þá kom upp ský af ösku og vikri sem barst yfir Santor­ini og hafði mjög slæm áhrif og gerði mik­inn usla á norður­hluta eyj­ar­inn­ar,“ sagði Haraldur.

Síðast varð þar eldgos árið 1950.

Frétt af mbl.is

Brún öskjunnar eins og hnífsegg

Forsætisráðherra Grikklands kom til Santorini í dag og hitti þar slökkviliðsmenn meðal annars. AFP

Engin bráð hætta, segir forsætisráðherrann

Gríski forsætisráðherrann Kyriakos Mitsotakis fullyrti í dag að enga bráða hættu stafaði af þessari fordæmalausu skjálftahrinu, þegar hann heimsótti Santorini og hitti þar íbúa og viðbragðsfólk.

Virknin hefur komið jarðvísindamönnum í opna skjöldu, sem segja að ekki hafi mælst önnur eins skjálftavirkni frá því mælingar hófust árið 1964.

• Blogga um frétt