Varnargarður kom í veg fyrir að snjóflóð sem féll úr Strengsgili við Siglufjörð lenti á byggð. Að sögn lögreglunnar á Siglufirði virkaði garðurinn, sem byggður var í sumar, alveg eins og hann átti að gera og fór flóðið meðfram honum þótt hann sé ekki fullgerður.

Lögreglan sagði að vart hefði orðið við flóðið klukkan hálfþrjú í dag en talið væri að það hefði fallið nokkru fyrr. Snjóflóðaeftirlitsmaður rannsakaði verksummerki en ekki hefur verið tekin ákvörðun hvort hús verða rýmd vegna frekari snjóflóðahættu.