ALÞJÓÐLEGA siglingakeppnin, Skippers d'Islande, sem íslenska skútan Besta tekur þátt í, hélt áfram í gærmorgun er skúturnar tíu héldu til baka til hafnarbæjarins Paimpol á Bretaníuskaga í Frakklandi. Ræst var með fallbyssu Landhelgisgæslunnar og eiga skúturnar um 1.330 mílna leið fyrir höndum og er reiknað með 7-13 daga siglingartíma.

Þegar Morgunblaðið hafði samband við Baldvin Björgvinsson, skipstjóra Bestu, í gærkvöld, var skútan að nálgast Reykjanesvitann. Hann sagði að siglingin út Faxaflóa hefði verið leiðinleg, þar sem lítill sem enginn byr hefði verið og að það sem helst hefði skemmt mönnum hefðu verið hvalirnir sem fylgdu skútunni meðfram Reykjanesinu.

Í gærkvöld var ein skúta á undan Bestu, en Baldvin sagðist gera ráð fyrir því að ná henni í dag eða á morgun.

Þess má geta að þrátt fyrir að koma fyrst í mark í keppninni frá Paimpol til Reykjavíkur er Besta í níunda sæti í keppninni, en keppt er eftir forgjöf, sem er óhagstæð Bestu þar sem hún er stærri og hraðskreiðari en hinar keppnisskúturnar.