Innlent | mbl | 5.2.2001 | 15:09 | Uppfært 15:37

Norðmenn leyfa sýningu á Veldi tilfinninganna eftir 25 ára bann

Nagisa Oshima var staddur ásamt leikkonunni Uno Kanda á kvikmyndahátíðinni í Cannes í maí sl. en mynd hans Gohatto (Taboo), keppti við Myrkradansarann um gullpálmann. mbl.is

Banni við sýningu kvikmyndarinnar Veldi tilfinninganna, eftir japanska kvikmyndaleikstjórann Nagisa Oshima, hefur verið aflétt í Noregi, 25 árum eftir að það var sett á. Deilur hafa staðið um hvort myndin sé sígilt listaverk eða hvort hún sé tilraun til að klæða klám í listrænan búning. Til stóð að sýna Veldi tilfinninganna á kvikmyndahátíð í Reykjavík 1978 en hætt við þegar sýnt þótti að saksóknari myndi leggja fram kæru ef af sýningu yrði. Sam-bíóin keyptu síðar sýningaréttinn og hafa öðru hvoru reynt að fá kvikmyndina leyfða til sýninga án árangurs.