Búist er við að minnsta kosti 30 skútur verði á Pollinum á Akureyri í júní í sumar í tengslum við siglingakeppni milli Íslands og Frakklands. Keppnin hefst í bænum Paimpol á norðurströnd Frakklands og sigla skúturnar til Reykjavíkur og þaðan til Akureyrar og síðan til baka til Paimpol.

Árið 2000 var fyrst skipulögð siglingakeppni á skútum frá Paimpol í Frakklandi til Reykjavíkur. Keppnin er til minningar um siglingar franskra sjómanna á fengsæl fiskimið við Íslandsstrendur fyrr á tímum en einnig í þeim tilgangi að efla tengsl við Íslendinga.

Nú á að endurtaka keppnina því hún tókst með ágætum fyrir þremur árum og vilja aðstandendur bæta Akureyri við sem áfangastað. Leiðin verður því Paimpol-Reykjavík-Akureyri-Paimpol. Keppnin hefst 1. júní í Paimpol og verður komið til Akureyrar 19. eða 20. júní. Farið verður frá Akureyri áleiðis til Paimpol 22. júní að því er fram kemur á heimasíðu Akureyrarbæjar.

Skipuleggjendur keppninnar eiga von á því að í það minnsta 30 skútur taki þátt í keppninni. Síðast var ein íslensk skúta með en vonandi verða þær fleiri núna.

Tengdar fréttir

Skútukeppnin Skippers d´Islande

Siglingin frá Grundarfirði til Paimpol ekkert sældarlíf

• Sigldi frá Grundarfirði til Paimpol á 9 dögum
• Frönsku skúturnar á leið heim
• Minnisvarði um franska sjómenn reistur á Grundarkampi
• Fá góðan beitivind út fyrir Snæfellsnes á leið til Grundarfjarðar

» Fleiri tengdar fréttir

• Blogga um frétt