Glerfarmur fór á götuna

Flutningabíll með glerfarm rakst upp undir Höfðabakkabrú í Reykjavík laust fyrir klukkan 17 í dag með þeim afleiðingum að glerfarmurinn brotnaði í mél og rigndi glerbrotum yfir nærstadda bíla. Engan sakaði en glerbrotin þekja talsvert stórt svæði á götunni við brúna. Búast má við miklum umferðartöfum næstu tvo tímana er borgarstarfsmenn hreinsa upp glerið.

Glerflutningabíllinn var með 20 tonna glerfarm á leið í austurátt og hafnaði hann að mestu á götunni og skemmdist einn bíll er glerstykkjum rigndi yfir hann.

Að sögn lögreglu er hámarkshæð farms á bílum á þessum kafla 4,20 metrar en um 4,40-4,50 metrar eru upp í brúna og því ljóst að farmurinn hefur verið langt yfir leyfilegum hæðarmörkum.

Hreinsunarflokkur frá borginni er kominn á vettvang en meðal annars verður hann að notast við moksturstæki svo þykkur er glerhaugurinn á götunni. Dreifðist glerið yfir allt að þrjár akreinar frá Höfðabrúnni og austur undir Selectverslunina sem er um 100 metrum austar. Vegna óhappsins hafa orðið miklar tafir á umferð um Ártúnsbrekku og Vesturlandsveg og verður svo áfram næstu tvær stundirnar eða svo meðan hreinsun stendur yfir.

Flutningabíllinn sem rakst upp undir brúna. mbl.is/Júlíus

• Blogga um frétt