Sleppi eldislax ítrekað úr kvíum getur hann hæglega útrýmt villtum laxastofnum í Norður-Atlantshafi. Er þetta niðurstaða umfangsmikillar rannsóknar vísindamanna í Skotlandi, Írlandi og Norður-Írlandi en hún hefur staðið yfir í 10 ár.
Tilraunir með blandaðan lax, seiði undan villtum laxi og eldislaxi, sýndu, að lífslíkur þeirra eru fremur litlar en 70% þeirra drápust á fyrstu vikunum eftir að þau klöktust út. Eldislaxinn átti líka erfiðara með að komast af úti í náttúrunni en sá villti og hann er miklu ólíklegri en hinn til að ganga upp í ár til að hrygna. Eldislaxinn vex hins vegar miklu hraðar en sá villti og þeir, sem ganga upp í árnar, bægja burt hinum villtu frændum sínum. Sagði frá rannsókninni á fréttavef BBC, breska ríkisútvarpsins.
Vísindamennirnir, sem fylgdust með tveimur kynslóðum laxa, segja, að mjög mikil afföll séu í blandaða seiðahópnum og þess vegna minnki nýliðunin í stofninum ár frá ári. Haldi eldislaxinn áfram að sleppa úr kvíunum, muni herða á þessari þróun þar til náttúrulegir laxastofnar verði útdauðir.
Talið er, að tvær milljónir eldislaxa sleppi úr kvíum við Norður-Atlantshaf á hverju ári. Það er helmingurinn af áætluðum fjölda villtra laxa á þeim slóðum.