„Veðrið hefur tafið okkur, en nú er að vora og við sjáum fram á betri tíð,“ sagði Hans Mastermo framkvæmdastjóri Seløy Undervannsservice sem freistar þess að bjarga fjölveiðiskipinu Guðrúnu Gísladóttur af hafsbotni við Lófót í Noregi. Hann kvaðst vænta þess að skipið næðist upp ekki seinna en um og upp úr páskum.

Mastermo sagði við Fréttavef Morgunblaðsins að starfsmenn Seløy hefðu stöðugt unnið á vettvangi að undirbúningi björgunar Guðrúnar undanfarið en óhagstætt veður hefði þó sett stórt strik í reikninginn.

„Góðviðrisdögunum fjölgar stöðugt eftir því sem vorar betur. Það er erfitt að segja til um hvenær við getum hugsanlega reynt að lyfta skipinu upp í yfirborðið, vonandi er ekki langt í það. Og við gerum okkur vonir um að það verði hægt í síðasta lagi upp úr páskum,“ sagði Mastermo.

Í samtalinu sneri hann hlutverkum við og spurði hvað væri að frétta af íslenska togaranum sem rekið hefði upp í fjöru við suðurströndina, en þar átti hann við Baldvin Þorsteisson EA. Fannst honum tilkomumikið að heyra að hann hefði náðst út og væri kominn til Noregs til viðgerðar.

Tengdar fréttir

Guðrún strandar

Ekki hreyft frekar við Guðrúnu Gísladóttur

• Hætt við leka mánuðum saman úr Guðrúnu KE-15
• Olía lekur á ný úr Guðrúnu Gísladóttur
• Guðrún Gísladóttir KE-15 yfirgefin
• Lítið var eftir af olíunni í Guðrúnu Gísladóttur

» Fleiri tengdar fréttir

• Blogga um frétt