Pakka með fíkniefnum kastað út um bílglugga við Blönduós

Lögreglan á Blönduósi hafði í gærkvöldi afskipti af ökumanni og tveimur farþegum bifreiðar á norðurleið.  Kannaðist lögreglan við mennina en þeir hafa komið við sögu hennar áður í ýmsum málum. 

Er ökumanni bifreiðarinnar voru gefin stöðvunarmerki var kastað út úr bifreiðinni litlum pakka, sem reyndist innihalda lítilræði af fíkniefnum. 

Mennirnir voru handteknir og færðir á lögreglustöðina á Blönduósi þar sem leitað var í bifreið þeirra, meðal annars með fíkniefnahundi lögreglunnar á Blönduósi.  Ekkert frekar fannst og var mönnunum sleppt að loknum yfirheyrslum.  Einn mannanna játaði að hafa átt fíkniefnin og kvað þau hafa verið ætlað til eigin neyslu.

• Blogga um frétt