Skipin við æfingar á alþjóðlegu hafsvæði

Rússneska sendiráðið á Íslandi hefur ekki fengið nákvæmar upplýsingar um æfingar rússnesku herskipanna, sem hafa farið fram austur af Vopnafirði undanfarna daga. Sergey S. Gushchin, þriðji ritari við rússneska sendiráðið, sagði í samtali við Morgunblaðið í gær, að herskip flotans væru við æfingar á Norður-Atlantshafi frá 25. september til 25. október.

"Að sjálfsögðu ekki í íslenskri lögsögu, heldur fara þær fram á alþjóðlegum hafsvæðum. Við höfum ekki fengið frekari upplýsingar um hversu stór floti er þarna eða hversu nálægt Íslandi herskipin eru," sagði Gushchin en lagði áherslu á að skipin væru á alþjóðlegu hafsvæði.

Sjálfstæðar heræfingar

Hann sagði að íslenska landhelgisgæslan vissi um þessar æfingar og hefði upplýsingar um þær.

Aðspurður hvort æfingar herskipanna væru hluti af fjögurra daga sameiginlegri flotaheræfingu Rússlands og Bandaríkjanna sem stóð yfir í Norðursjó í byrjun mánaðarins, sagði Gushchin svo ekki vera.

"Ég held að þetta séu sjálfstæðar heræfingar. Mér skilst að flotinn hafi verið í Brest í nokkra daga og hann farið þaðan til æfinga á Norður-Atlantshafi," sagði Gushchin.