Almannavarnaáætlun sett af stað

Almannavarnaáætlun var sett af stað í gærkvöldi vegna yfirvofandi eldgoss í Grímsvötnum.

Að sögn Víðis Reynissonar, verkefnafulltrúa hjá almannavarnadeild ríkislögreglustjóra, voru Flugmálastjórn og Vegagerðin virkjaðar, auk þess sem lögreglustjórarnir á Höfn og í Vík voru látnir vita. Öðrum samstarfsaðilum var einnig gert viðvart, en í þeim hópi eru m.a. björgunarsveitir, landlæknisembættið, Rauði kross Íslands og fleiri.

Fulltrúar Flugmálastjórnar og Vegagerðarinnar mættu í björgunarmiðstöðina í Skógarhlíð í gærkvöldi en þaðan er viðbúnaði Almannavarna stjórnað.

Þetta er í fyrsta sinn sem viðbúnaði vegna eldgoss er stjórnað úr nýju björgunarmiðstöðinni við Skógarhlíð í Reykjavík.