Ungur maður lést í snjóflóði

UNGUR maður, sem lenti í snjóflóði í Hoffellsdal í gær, var úrskurðaður látinn á ellefta tímanum í gærkvöldi, að sögn lögreglunnar á Eskifirði. Björgunarsveitarmenn fundu manninn klukkan 20.20 og fluttu hann á vélsleða niður að bækistöð björgunarsveitarmanna að bænum Hólagerði, skammt frá Hoffellsdal, þar sem læknir tók á móti manninum. Honum var komið í sjúkrabíl en endurlífgunartilraunir báru ekki árangur og var hann úrskurðaður látinn á leiðinni á Fjórðungssjúkrahúsið á Neskaupstað.

Hátt á annað hundrað björgunarmenn tóku þátt í leitinni að manninum, sem hafði ásamt félaga sínum verið á vélsleða í dalnum þegar flóðið skall á. Félagi mannsins slapp undan flóðinu og gat látið vita. Hann fór til móts við fyrstu björgunarmennina sem voru komnir á svæðið innan við klukkustund eftir að flóðið féll.

Allar björgunarsveitir á Austurlandi voru kallaðar út og sendar á svæðið til leitar en björgunarmaður með leitarhund hafði upp á manninum þegar hann hafði legið í snjónum í tæplega tvær og hálfa klukkustund. Hann var þá meðvitundarlaus og á kafi í snjó.

Óvenju stórt flóð

Að sögn Guðjóns Más Jónssonar, sem stýrði aðgerðum á bækistöð björgunarmanna, voru aðstæður til leitar ágætar en flóðið óvenju stórt og fór yfir mikið svæði. Hann segir það hafa verið nokkuð verk að koma björgunarmönnum upp á fjallið á vélsleðum og að betra hefði verið að hafa þyrlu á svæðinu.

Jón Gunnarsson, framkvæmdastjóri Landsbjargar, segir að alls hafi um 85 björgunarsveitarmenn verið á svæðinu og 80 til viðbótar verið kallaðir út, þar á meðal frá höfuðborgarsvæðinu, Suðurnesjum, Þingeyjarsýslu og Eyjafirði. Fjórir leitarhundar voru notaðir og segir Jón ljóst að þeir hafi skipt miklu máli og að án þeirra hefði tekið mun lengri tíma að finna manninn.

Viðbúnaður var hjá Landhelgisgæslunni og áhöfn TF-SIF var kölluð út kl. 18.44 og óskað eftir því að hún kæmi á staðinn. Hins vegar mat áhöfn þyrlunnar ástandið þannig að þyrlan myndi ekki nýtast í verkefnið vegna myrkurs en nætursjónaukabúnaður þyrlunnar hefur ekki verið vottaður.

Þyrlan var því afturkölluð en þyrla varnarliðsins kölluð út og var í þann mund að fara í loftið þegar tilkynning barst um að maðurinn hefði fundist. Þá var samhæfingarstöð Almannavarna virkjuð og fulltrúi Landhelgisgæslunnar var þar meðan á aðgerðum stóð.

Hinn látni var á þrítugsaldri. Ekki er unnt að greina frá nafni hans að svo stöddu.