Fær sekt fyrir að keyra of hægt

Það er ekki oft sem þarf að hafa afskipti af ökumönnum fyrir að keyra of hægt. Það gerðist þó hjá lögreglunni í Reykjavík í gær. Þá stöðvaði hún ökumann á Vesturlandsvegi en sá var með hjólhýsi í eftirdragi. Viðkomandi ók töluvert undir 50 km hraða og á eftir honum myndaðist löng röð bíla. Við þetta skapaðist hættuástand að mati lögreglunnar.

Að sögn lögreglunnar gerði ökumaðurinn með hjólhýsið jafnframt ekkert til að liðka fyrir umferðinni sem á eftir honum kom. Hann gaf hvorki öðrum bílum merki um að komast framhjá né ók til hliðar til að hleypa þeim framhjá. Á umræddum vegi er einmitt svigrúm til að gera slíkt.

Lögreglan segir að svona aksturslag geti kostað viðkomandi ökumann tíu þúsund krónur í sekt og tvo punkta í ökuferilsskrá.

• Blogga um frétt