Vonir standa til þess, að þegar í stað verði hægt að aðskilja akstursstefnur á Suðurlandsvegi og Vesturlandsvegi þar sem aðstæður leyfa og breikka vegina þar sem brýnast er. Segir samgönguráðuneytið, að með þessu verði hrundið í framkvæmd árangursríkum aðgerðum í þágu aukins umferðaröryggis.

Fram kemur á heimasíðu samgönguráðuneytisins, að haldinn var í dag fundur í samgönguráðuneytinu um umferðaröryggismál og framkvæmdir við endurbætur á Suðurlandsvegi og Vesturlandsvegi og voru málin rædd frá ýmsum hliðum. Tilefnið var að Alþingi hefur samþykkt sérstaka fjárveitingu á fjáraukalögum til umferðaröryggisaðgerða á vegunum tveimur.

Segir ráðuneytið, að þar sem umferðaröryggisaðgerðir á Suðurlandsvegi og Vesturlandsvegi þoli enga bið sé mikilvægast, að bregðast við með aðgerðum sem nú þegar gefa aukið öryggi á hættulegustu vegarköflunum.

Fram hefur komið að markmið og stefna Sturlu Böðvarssonar, samgönguráðherra, sé að Suðurlandsvegur og Vesturlandsvegur verði tvöfaldaðir og að verkefnið verði sett í samgönguáætlun sem kemur til meðferðar Alþingis í byrjun næsta árs. Slíkar framkvæmdir eru umfangsmiklar og flóknar og krefjast margháttaðs undirbúnings svo sem hönnunar og umhverfismats. Hefur Sturla þegar falið Vegagerðinni að hefja undirbúning að tvöföldun veganna á sviði skipulagsmála og umhverfismats.

Fundinn í dag sátu fulltrúar samgönguráðuneytisins undir stjórn Ragnhildar Hjaltadóttur ráðuneytisstjóra og ýmsir sérfræðingar sem starfa á sviði umferðaröryggismála og vegagerðar, þau Ólafur Guðmundsson, verkefnisstjóri EURORAP vegamatskerfisins og varaformaður Félags íslenskra bifreiðaeigenda, Birgir Hákonarson frá Umferðarstofu og Auður Þóra Árnadóttir frá Vegagerðinni.

Tengdar fréttir

Suðurlandsvegur

Þök og bílar fjúka í Eyjum

• Hægt að tvöfalda Suðurlandsveg fyrir 7,5 milljarða
• Þingmaður krefst tvöföldunar Suðurlandsvegar
• SASS fagnar pólitískri samstöðu um Suðurlandsveg
• Ekið með undirskriftir frá Selfossi til Alþingishúss

» Fleiri tengdar fréttir

• Blogga um frétt