Tæknilegir sérfræðingar Siglingastofnunar ásamt ráðgjafa útgerðarinnar sem rekur síldarskipið Súluna eru nú að fara yfir þær ljósmyndir sem kafari tók af skemmdum á botni skipsins.

Karl Jóhann Birgisson rekstrarstjóri útgerðarsviðs Síldarvinnslunnar á Neskaupsstað sagði í samtali við Fréttavef Morgunblaðsins að beðið væri eftir því að sérfræðingarnir legðu mat á skemmdirnar.

„Ég veit það ekki, ég hef ekkert staðfest um það, ég hef heyrt að það sé gat hér og gat þar en ég hef líka heyrt að skipið leki ekki þannig að ég get ekki staðfest neitt um þetta,” sagði Karl Jóhann.

„Við verðum að fá upplýsingar um það hvort skipið hefur haffæri til að sigla einhverja leið því það er fullt af síld og besti kosturinn væri að geta siglt skipinu áfram,” sagði Karl Jóhann að lokum.