Hanna Birna Kristjánsdóttir, formaður skipulagsráðs Reykjavíkurborgar, vísar til bókunar borgarráðs vegna kaupa borgarinnar á Laugavegi 4 til 6 þegar hún er spurð um það hvort borgin muni grípa til svipaðra aðgerða vegna annarra húsa í miðbænum sem Húsafriðunarnefnd vill friða.

„Við áréttum að þessi samþykkt felur ekki í sér fordæmi fyrir önnur hús á svæðinu og leggjum áherslu á heildarskoðun gamalla húsa í miðborginni, sérstaklega við Laugaveg,“ segir í bókuninni.

Heildarendurskoðun

Hanna Birna segir borgaryfirvöld sammála um að fara í heildarendurskoðun á þeim málum sem tengjast Laugaveginum. „Við munum gera það í góðri samvinnu við Húsafriðunarnefnd og aðra. Það er það verkefni sem við erum að hefja,“ segir hún.

Hanna Birna segir að þótt búið sé að heimila niðurrif á þremur af þeim ellefu húsum sem Húsafriðunarnefnd vill friða þá megi ætla að enn sé talsvert ferli eftir áður en þau verði fjarlægð.

Við vinnslu fréttarinnar náðist ekki í Ólaf F. Magnússon borgarstjóra.