Innlent | mbl | 19.2.2008 | 14:03 | Uppfært 14:39

Innanhúsrannsókn stendur yfir hjá lögreglunni

Annþór slapp út um glugga á annarri hæð lögreglustöðvarinnar við Hlemm. Árvakur/Brynjar Gauti

Lögreglan rannsakar enn hvernig það atvikaðist að fanga tókst að sleppa úr fangageymslu á annarri hæð lögregluhússins við Hlemm í Reykjavík síðast liðinn föstudag. „Málið er á borði lögreglustjóra og bíður frekari umfjöllunar," sagði Geir Jón Þórisson yfirlögregluþjónn í samtali við Fréttavef Morgunblaðsins.

Geir Jón sagði að rannsókn á málinu stæði enn yfir og verið væri að fara yfir verkferla og annað sem tengist þessu máli. „Lögreglustjóri er að fara yfir þau gögn sem hann hefur fengið um málið," sagði Geir Jón.

Fanginn sem strauk, Annþór Kristján Karlsson kom fyrir dómara í Héraðsdómi Reykjaness sama kvöld og var úrskurðaður í þriggja vikna gæsluvarðhald. Hann var í kjölfarið fluttur í fangelsið að Litla Hrauni.

Annþór strauk úr haldi lögreglunnar á Hverfisgötu með því að brjóta sér leið út um glugga þar sem hann var á svokölluðum fangagangi.

Tveir aðilar, karl og kona, voru svo handteknir síðdegis á föstudag grunuð um að hafa aðstoðað Annþór við flóttann eftir að hann komst út úr fangelsinu. Karlinn var handtekinn á höfuðborgarsvæðinu en konan á Suðurnesjum. Þau eru bæði laus úr haldi lögreglu.

Annþór, sem er 32ja ára, hefur verið í gæsluvarðhaldi í tengslum við fíkniefnamál, en hann hafði komið inn til vistunar í fangageymslunni á fimmtudaginn að beiðni lögreglunnar á Suðurnesjum og fíkniefnadeildar ríkislögreglustjóra.